Mahantra ny vahoaka

Tsy mety tafavoaka

anatin’ny krizy sy fahantrana lalina

Toa mihamilentika andro aman’alina

Mba miezaka ihany

fa tsy mandany andro misento sy tomany

Miasa sy mitozo

Na dia efa vizana sy mangozohozo

Ny hanina ampitso mantsy tsisy mba mangirana

Ny hatokona anio aza mbola manahirana

Ny aina efa reraka, ny adidy koa miavosa

Dia iny mihazakazaka mba hibaby trosa

Faly fa omeny karama iray volana

Mantsy izay no heveriny ho famahana olana

Zara aza misy vola afaka alaina

Dia manaiky mora fa tsy te hiasa saina

Toy ny akohokely tsipazam-potsimbary

Tsy menatra intsony fa mbola maka sary

Dia moa ve ho tafarina?

Aza hitako hono marina

ka mainka koa sahirana

satria dia trosa indray izany izao no nidirana

Vola mbola hefaina fa tsy maimaim-poana

Enga anie ka ho tafarina fa tsy bokan-trosa foana