Ray ô, omeo fo tony aho raha toa ka sitrakao 
Mba tsy  hankahala noho izao zava-misy izao
Torovana ihany manko ny saina amam-panahy
Mahita ny mahazo ireo manodidina ahy

Fianakaviana firy no misedra fahoriana 
Tokantrano maro no mizaka fijaliana 
Latsaka an-davaka ihany koa ny firenena 
Misy ny mpitondra anefa mampanongo tena

Tsy tahotra tsy henatra fa manampahefana
No miteniteny foana ary tena higagana
Manao tsinontsinona ny fahoriam-bahoaka
Miteraka hatezerana ao am-po tsy miloaka 

Mila fitoniana izao ny foko sy ny saiko
Ampio aho hahafehy izay zavatra lazaiko
Ampianaro hanaiky izay tsy azoko ovaina
Dia hahay hisaotra fa mbola velon’aina

Rasamy

• Fiaraha-monina