Kivikivy angamba ianao fa tena mafy ny manjo
Tsy hita intsony izay atao ka mitady hamoy fo
Isan’andro vaky izao dia toa mandalo  fisedrana
Mandreraka sy mankalao ny olana tsy hay vahana

Izay rehetra mba atao toa tsy hahitana fahombiazana
Efa niantso an’Andriamanitra, efa niantso koa ny razana 
Nefa tsisy mba mangirana mainka matroka sy maizina
Manontany tena hoe nahoana loatra ary aho no faizina

Vao mainka moa marary fo mahita ny hafa toa ambinina 
Toy ny tsisy mahaory na lohataona na ririnina 
Toy ny tsy mba manan’olana fa dia sambatra sy miadana 
Toa niangaran’Andriamanitra ary notahin’ny razana 

Diso mihitsy anefa ianao mieritreritra an’izany 
Manana olana avokoa raha mbola velona eto an-tany
Fa maro no mizaka ny azy ao am-pony ao mangina 
N’inona n’inona mianjady dia mampiseho fifaliana 

Tsy hoe akory falifaly dia tsisy olana sedraina
Fa safidy mihitsy ny azy manatanjaka ny saina
Hainy fa tsy vahaolana ny sentosento sy taraina 
Tsy sasatra izy manantena fa hisava io ny  maraina 

Rasamy

• Saina Miabo