Manoratra aho satria, nomena talenta
Na toa aza tsotsotra tsy tena avo lenta
Toy ny an’ireo mpanoratra malaza be fahiny
Dia tia manoratra aho fa aza omena tsiny

Manoratra aho satria, mamelona ny teny
Io no tenin-drazako, no sady tenin-dreny
Tsy tiako ho vonoina, tsy tiako ho vofafa
Ilay teny malagasy ambony noho ny hafa

Manoratra aho satria, misy zavatra ambara 
Io asa soratro io tiako hipetraka ho tantara 
Aingam-panahy tsotra, tsy sarotra takarina
Milaza zava-misy, miteny zava-marina 

Manoratra aho satria, ny soratra mitoetra 
Io « redirediko » io, natao ho an’ny rehetra 
Mety mampahery, na koa mitaraina
Tsy natao handratra fa kosa hampisaina  

Rasamy 

• Saina Miabo