Lany olomanga ary ve ny fireneko
Mankarary fo ny zavatra mba reko
Momba ireto olona nomena fahefana 
Mampivarahontsana ny resa-pitsarana 

Izy samy izy ihany no miady an-trano
Tantara tena misy, tsy abobo na angano
Anaty tambazotra, mivoaka an-gazety
Miharihary ao ireo zavatra tsy mety

Voatonontonona aby ireo olona ambony 
Tsiambaratelo maro tsy voatana intsony 
Na halatra, na hosoka, indrindra kolikoly 
Mitohy ny tantara, zary lasa fialamboly 

Variana aho mitazana an’ireto mpilalao
Rahoviana vao hifarana izao tantara izao 
Moa lany tanteraka tokoa ve ny olomanga
Fa tena mahakivy ny zavatra mitranga

Ao ireo tsy nahay efa hita hatry ny ela
Mahazo seza ihany sady mbola lava lela 
Atao mpanolotsaina, alefa ho masoivoho
Hany ka mandositra ireo tena ati-doha

Rasamy

• Tanindrazana