Rehefa miova ny Andriana dia miova koa ny Sata

Na tiana na tsy tiana dia miova ireo Tandapa

Misy ireo miala ka mangasihasy kely

Fa misy indray mibontsina tsy hita velively

Na izany na tsy izany dia tsy maintsy misy foana

Tena mahavariana f’asa loatra re nahoana ?

Ireo olona mamadika indray ny palitaony

F’izay no mahazatra sy fomba amam-panaony

Raha mangamanga ohatra teo aloha ny sary

Dia miova tampotampoka ho volomboasary

Tsy vitan’ny tsy tiany fa olona nompainy

No indro indray dokafany sy indraindrainy

Tsy manan-kambo intsony fa toa mivaro-tena

Seza no ilainy mba hangoron-karena

Vola, voninahitra no tena mba katsahiny

Hany ka amidiny hatramin’ny fanahiny

Mivadika ny lelany sy zavatra lazainy

K’ilay nafokainy, lasa olona hajainy

Mivoaka an-gazety satria mampiasa felaka

Izay no tetikadin’ireto mpisolelaka