Faly ery ny fo fa niova indray ny taona
Miramiran’endrika fa mbola tafahaona
Izao no teny soa sy teny firariana 
Hitobaka hatrany anie ny fitahiana 
Na ho anao izany na ny ankohonanao 
Ho taom-pahombiazana ny taona vaovao

Raha nisy ny tsy nety tamin’ny taona lasa
Na tamin’ny fianarana na ny arak’asa
Raha nisy tsy tomombana tamin’izay natao 
Fombany ihany izany fa ny loha no hatrakao 
Mahaiza aloha mifaly fa mbola velon’aina  
Hanefa izay tsy vita sy mbola hokasaina

Maro aza anie no naniry ho toa antsika
Saingy tsy afa-niala fa lasana niampita
Nandeha nialoha lalana lasa nodimandry 
F’isika ireto kosa mbola asainy miandry 
Koa araraoty ary ny fotoana izay mandalo 
Ndeha hifankatia fa tsy ho mpifahavalo

Rasamy

• Saina Miabo