Moa ve fahotana sa fahasalamana 
ny etotra tsy tana? 
N’iza n’iza mantsy, n’aiza n’aiza koa
Na mizipo ianao, na mipataloha
Dia ho avy ny fotoana 
hangetongeto-poana 
Tsy fanahy iniana fa lasalasa hoazy 
Etotra tsy tana fa tsy hoe vazivazy

Fa misy karazany ny etotra tsy tana
Ao ny misy fofona manenika tanàna 
Ny sasany mangetotra maneno mafy be
Dia ao ny tsisy feo fa mitsifotra tsy re
Misy koa mahagaga fa hainy tsara mihitsy
Ilay mangeto-dava tsy ankitsitsitsitsy
Tsy henatra tsy tahotra f’ataony tsotra izao  
Rivotra masiso no avelany ho anao

Dia misy ireo mangetotra mody tsy miteny
Ny fofona avoakany mandoto rivotra eny
Dia mody tsy miraika, sady mody fanina 
Tezitra ny sasany tsy mahahinan-kanina
Fa ny mahagaga dia ny mpifakatia 
Rehefa te hangetotra dia « azafady akia » 
Kinanjo aty aoriana rehefa indreo nivady
Dia ny resak’etotra no lasa fototr’ady

Fa misy ihany koa ireo olona mijaly  
Tratry ny aretina any anaty hopitaly
Andrasana ilay etotra hivoaka amin’izay  
Indrisy tsisy intsony f’efa simba ilay tsinay
Hamaranako azy dia efa fantatsika 
Ny fomba amam-panaon’ny mpanao politika
Tsisy mba tanteraka izay ampanantenainy  
Fa dia « resak’etotra » no zavatra lazainy

Rasamy

• Fiaraha-monina