Izahay fony ankizy dia niara-nilalao
Ny raharaha an-trano niarahana nanao
Mba niadiady kely nifampila kisa koa
Fa tsy nifankafoy satria mpiray tampo

Nitombo avy eo ny taona nandalo hatanorana 
Niara-nifanjevo tamy bandy ao an-tanàna 
Niarahana nandeha na sekoly na fiangonana 
Ny akanjo sy kiraro aza nisy niombonana

Nony aty aoriana moa dia samy nanambady 
Dia samy toa variana miasa sy mitady
Fa rehefa tafahaona dia faly sy korana
Sakafo be io foana no iraisana mazàna 

Iriko hitohy hatrany ny fifankatiavanay 
Ho mpirahalahy mifankatia mandrakizay 
Tsy ho toy ny sasany tsy mifandevi-maty
Fa miady an-trano noho ny lonilony anaty 

Rasamy

• Fiaraha-monina
• Fitiavana