Ry Dadabe Noely ô,
Raha ho avy ihany ianao
Miangavy re… raha mbola azo atao
Mba itondray rano e
ny isan-tokantrano 
fa dia mijaly loatra 
Mila tsy ho zaka fa tena tafahoatra 
izato toetr’andro sy ny zava-misy 
Alaivo sary an-tsaina anie ilay rano tsisy e
Na ny olon-tsotra, na ny mpandraharaha 
Tsy lazaina intsony ny momba ny tantsaha
Kivy noho ‘ty olan-drano toa tsy mety hivaha

Ry Dadabe Noely ô, 
Raha toa ka sitrakao 
Ajanony kely aloha irony  kilalao 
fa rano hosotroina sy ambolena vary 
no ataovy misimisy tsy ho tonga ny mosary
Raha toa moa sanatria tsisy azonao atao 
dia ny mpitondra  anay re no mba ilazao e
Jereo malakilaky hoe f’aza dia variana
Eritrereto tsara hoe ny fomba fandaniana
Vonjeonareo haingana ny seham-pamokarana
Ny rano hono hoe atao kitro ifaharana 
Fa tsy ny rendrarendra indray no lasa lohalaharana 

Rasamy

• Fiaraha-monina