Misy ny androm-pitsikiana
toy ny tsingerin-taona, 
dia misy ny androm-pahoriana, 
malahelo sy misaona 

Misy ny androm-pifaliana 
sambatsambatra aok’izany, 
fa misy andro itomaniana 
noho ny hetraketraky ny tany 

Misy ny andro maharavo 
rehefa anaty fahombiazana, 
fa misy andro koa mba lavo, 
fahakiviana indray no tazana 

Misy fotoana tena maina
tsy mety latsaka ny orana, 
fa ho avy ny andro hitaintaina 
ny rano be indray no atahorana 

Izay ilay fiainana an-tany 
samia mizaka ny anjarany, 
fa ny tsiky sy tomany 
no mifandimby tsisy farany

Rasamy

• Saina Miabo