Tena ginagina ny vahoaka manontolo
Na tambonivohitra na tambanivolo 
Misafosafo loha dia mila tsy hahateny
Mahita ireto loza manjo ny fireneny

Vao lasa ny haitany dia tonga indray ny loza 
Valala, tondra-drano ary koa ny rivodoza 
Ny fahoriam-bahoaka efa tsy lazaina intsony 
Variana miady an-trano nefa ny olona ambony

Isan’andro izao eny anaty fesiboky
Tantara mahagaga toy ny mamaky boky
Miseho daholo ny henatra sy ny hadalana 
Toa feno kolikoly koa anaty fanjakana

Mahalasa saina ny zavatra mitranga
Mihalalina ihany ny tsy fitovin-tsaranga
Vizana etsy andaniny ny vahoaka efa kola
Ny sasany etsy ankilany hono milalao vola

Ho aiza isika ity, ahoana no hiafarana e? 
Moa marina ve ireny ry manam-pahefana ô?
Ny hasarotam-piainana efa mila tsy ho zaka
I Gasikara simba sady tena afa-baraka e

Rasamy

• Tanindrazana