Misy ny mivavaka amin’ny zavamananaina
Ny hazo sy ny biby no tiany hamasinina
Ireny no heveriny ho manavotra ny aina
Izay no finoany, tsy ataoko tsinontsinona 

Misy ny mivavaka amin’ny razambeny
Tiany sy hajainy, ary koa henoiny 
Manana ny fomba amam-panaony ireny
Izay no mahasambatra ny sainy sy ny fony

Misy ny mivavaka amin’ny sarisary vongana
Ao koa ny mino Zanahary an-danitra any
Mino sy matoky fa  tsy very na ho fongana 
Handova paradisa raha mandao itony tany 

Misy mpino samihafa isaky ny firenena 
Tsy mitovy foana ny Andriamanitra tompoina
Hajaina ny an’ny hafa, deraina ny an’ny tena 
Tsy tokony ampiady ny resaka finoana 

Rasamy

• Fiaraha-monina