Mandeha tokoa ny fotoana
fa vetivety foana
dia feno dimapolo taona

Toa tadidiko etoana,
tsy adino fa tsaroana
irony androm-pahazazana
sy ny fahatanorana
Raikitra ho fahatsiarovana 
ny fiainana izay nandalovana,
ny sarotra izay nodiavina,
sy olona izay notiavina,
ny ezaka izay nahatafita.
Misy koa izay tsy vita
kanefa tsisy hanenenana,
fa ny andro sisa dia hanarenana 
izay mbola azo hatsaraina,
satria dia mbola velon’aina

Hiaraha-mahalala firifiry 
ireo  nikasa sy naniry
ho feno dimapolo  koa,
f’ndrisy lasana nialoha.
Koa raisiko ho fitahiana 
ankalazaiko am-pifaliana 
izao andro anio izao.
Ray ô, misaotra Anao
Tena faly aho satria 
velona miriaria, 
mbola mijoro tsy marary.
Misaotra anao r’Ilay Mpahary
satria matoa aho toy izao, 
dia noho ny Fahasoavanao.

Rasamy

• Saina Miabo