Avereno re ny volany raha toa ianao nitrosa
Mahagaga mihitsy fa dia misosasosa 
ny vavanao miteny rehefa hoe hangataka
Kanefa aty aoriana dia mody mihatakataka

Omeo tsisy farany, ao mba ampindramo
Fa rehefa hamerina dia mikatramotramo
Sady tsy mangina fa mbola basivava 
Gisa homan-ketsa k’izy indray no avo vava

Iny volany iny anie ka vidin-katsembohana
Azy dia takiany, f’aza dia kepohana
Mankarary  azy ny volany raha very
Ianao no tsy menatra manao fangalam-piery 

Mainka izy sosotra sy marary fo
Mahita anao miedina makatsy makaroa 
Mampidera fiainana anaty tranonkala 
Takiana trosa anefa mody misary adala 

Rasamy

• Fiaraha-monina