Mahantra toe-tsaina
ny olona variana mijanona sy miaina
amin’ny zavatra efa lasa
Ary n’inona n’inona mety ho kinasa
dia ny tahotra indray no tonga mialoha
Tsy manam-pahasahiana, malemilemy loha
Sady tsy mba vonona hianatra ihany koa
Mimenomenon-dava sy manaiky faharesena 
Lazainy fa devoly izay manan-karena 
Dia mialona ny namany mahita fandresena 

Toe-tsaina tsara kosa
ny an’ireo tsy mialona, tsy tia mifosafosa 
Mifaly amin’izay azony omaly sy androany 
Miasa sy maniry fa any aoriana any
dia hahazo fahombiazana 
na hita izao aza fa sarotra sy mazana
ny lalana hodiavina sy sedra holalovana 
Tsy mitaraindraina na mora torovana 
Miala amin’ny fahazarana hitany fa ratsy 
Manampy ny hafa koa rehefa tsara vatsy

Rasamy

• Fiaraha-monina