Fisainana bontolo

Mampalahelo ny vahoaka
fa lasa izy mitsoaka 
vao manomboka mipoaka
ny baomba sy ny basy
Tsy te hiady intsony ve ireto malagasy
Zary manaiky sisa
Hany ka manjakazaka iretsy vitsy an’isa
Manana ny hery sy ny fahefana 
Toa mitovy avokoa izay mahazo fitondrana 
Samy mampanantena 
fa hampandroso firenena 
Mahay mikabary tsy mihambahamba
Kanefa dia vonona hanao ampihimamba
ny fahefam-panjakana 
Manao izay tiany atao amin’ny didy sy lalàna 

Te hikiaka ny vahoaka 
Saingy tsy afaka mivoaka 
mba hiteny sy hilahatra eny an-dalambe 
Anaty fesiboky sisa no manao resabe
Mamoaka ny ao am-pony 
Tsisy zavatra hafa azony atao intsony
Ny mpitondra variana manohitra mpanohitra 
Ny mpanohitra variana mandeha mitety vohitra 
Iretsy mpisolelaka kosa etsy andaniny 
Mainka koa mandrangitra mahazo ranondranony
Ny fanaovam-politika rahoviana vao hiova
Hanahoana ny hoavin’ny taranaka mpandova
Tsy misy mba manao fijery lavitra daholo 
Lany andro mifandramatra sy mifamono lolo
Tiantsika loatra mantsy ilay fisainana bontolo 

Rasamy

• Tanindrazana