Endrey ny hankatonao re ry Vohitsara
Efa tany sambatra tokoa i Gasikara
Feno fandrosoana, milamina ny tany
Ny mpitondra hendry tsisy toy izany 

Hafa ny taloha f’efa niova ny tantara 
Ny vokatra nitombo, ny ariary nihatsara
Tsisy kolikoly na fisaraham-bazana
Miharihary be ny fitiavan-tanindrazana

Ny ankizy sy tanora miditra an-tsekoly
Lasa nihavitsy ny karazana tempoly
Orinasa gasy no mameno ny tanàna  
Resy ny vazaha sy sinoa ary karana

Milamindamin-tsaina avokoa ny vahoaka 
Vitsy ihany sisa ireo mandositra mivoaka 
Betsaka aza moa ireo nody soamantsara 
Toy ny paradisa ny eto Madagasikara 

Kinanjo… 
Taitra tampoka aho, fa hay izaho natory
Nanonofy aho kay fa tsy tena izy akory 
Nitsangana aho nijery teo am-baravarankely 
Fahantrana no hita fa tsy izany velively

Rasamy

• Tanindrazana